Text des Monats Dezember 2025
zurück
Claudia Zimmer (Quierschied)
Hygienestreß
Ich han's schwer midda Hygiene
vor Chemie han ich kää Angschd
Silikone, Parabene
Was die Sauwakääd valangd
Schmier ich uff mich ohne Gnade
Paraffin un Silikon
In Alkalije dun ich bade
E Tensiddusch macht mich froh
Natriumsulfat is klasse
Das macht scheena Badeschaum
Un mei lange Loggemasse
Genn dank Glycerin e Traum
Dass ich hinnenoo gudd rieche
Mache Duftstoffe wie nix
Die Chemie bied do inzwische
Jeda noch so irre Mix
Doch wer jetzt denkd, die Umwelt wär ma
Womeeschlisch schnurz un worschdegal
Der irrt sich! Denn ich hol e Ääma
Mei Gewisse hadd kää Wahl
Mei Badewassa schebb ich fleißisch
Miehsam aus da Badebidd
Geje Bladdleis helfd's, das weiß ich,
Wemma's an die Rose schidd.
Ich dun die Brieh gleich dreifach nuddse
Schnabb ma de Schrubba, ei jo, doch
Dun erschd moo noch mei Boddem buddse
Fa die Bladdleis gedd's dann imma noch
Nur ään Problem muss ich noch leese
Weil noo dem Buddse bin ich juschd
Baddschnassgeschwiddsd. Das is das Beese
Ich missd grad widda unna die Dusch.
U'm Sofa rägeld sich mei Kaada
Do paggd mich uff äämoo die Raasch
Das ganze Buddse, Schrubbe, Bade
Is doch irgendwie fa de A...
Dem Kerl sei Fell glänzd wie e Schbeggschwaad
Schwadds wie Schuhwichs, der brauch käa Chemie
Sei weiße Flegge ohne Dregg dran
senn poredief rein ganz ohne Persil
Un schdinke dud das Vieh jo aa ned
A guggd mich an un leis' miaut's:
Mach's doch wie ich, spar Da die Arwed
Un budds Dich mid Dei'm eijne Schbaudz!