Text des Monats April 2023
Fritz Schneider (Haazfritzje) (Saarbrücken)
Säfebloose
Am Finschder huckt mei klääni Grott
Un brutschelt Säfebloose;
Die flieje „bis zum liewe Dott“,
Die klääne wie die große.
Guck doch die dick, die wo dort fliet,
Die wo zum Kirchturm drillert
Un wie e scheenes Kinnerlied
In bunde Farwe schillert!
Du mennscht, die fliet zum liewe Gott?
Ach Kind, die Richdung hat se,
Doch bloost der Wind heit viel zu flott,
Der bringt se gleich zum Blatze ...
Doch dreescht dich mit uns Große, Kind,
Mir hann de selwe Kummer,
Aach uns blatzt mancher Wunsch im Wind
Als Säfebloose-Nummer.
Dann greift ma mit der Hand zum Hals
Voll Driebsinn un versauert;
Bloß daß es bei uns Große als
E bißje länger dauert.
Doch ännert sich die Menschheit nie,
Wie Kinner sinn die Große:
Ma tunkt de Schdrohhalm in die Brieh,
Bloost immer neie Bloose ...
In Mundartpost Nr. 87