Text des Monats März 2024

zurück



Günter Speyer (Kaiserslautern)


Frihjohr


Es leit was in de Luft, ma kann's schun rieche.

Vum Eis un Schnee is fascht nix meh zu siehe.

Schneegleckcher, Krokus kumme raus un bliehe.

Spazieregehe is es reinscht Vergnieche.


Die Vechel diriliere in de Hegge.

Un in de erschde warme Sunnestrahle

dun Äädechse sich uff de Maure aale.

Es Frihjohr kummt, ma merkt's an alle Egge.


Es will de garschdich Winder jetzt vertreiwe.

Mit neiem Licht dut die Nadur sich ziere,

ma männt, es Bloo'e kämt vum Himmel runner.


Mit Worde is das ball net zu beschreiwe.

Doch unser Herz kloppt selich un dut's spiere.

Es is doch jedesmol e neies Wunner.




Aus: G. Speyer „Geschiddelt un gestabt – Experimente, Prosa und Gedichte in

pfälzischer Mundart“ Kaiserslautern 1995 Selbstverlag



In Mundartpost Nr. 91