Text des Monats Januar 2023
Eugen Damm (Kaiserslautern)
Immer an de Johresschwelle …
'S neie Johr, was werds uns bringe?
An Winsche werd do net geschbart -
E Haufe Glick vor alle Dinge,
Net nor dienschtlich, aa privat!
Gesundhäät schteht an erschter Schtelle,
Ohne die werd kää Mensch froh -
Besonnersch an de Johresschwelle
Sinn halt „die Gedanke do“.
De Friede werd vun all ersehnt,
Obwohl mer denne kaum noch find',
Doch bleibt er selde unerwähnt
Wann e neies Johr beginnt.
De liewe Gott möcht uns verschone
Vor schwerer Krankhäät, Pein un Schmerz,
In jeder Menschebruscht soll wohne -
E fröhlisches, schdabiles Herz!
Mit Winsche kann net viel bassiere,
Dess iss vun vornerin schunn klar -
Die lossen leicht sich konserviere
Bis zum nägschde Neijohrsdaa.
In Mundartpost Nr. 86