Text des Monats Juli

Christel Keller (Völklingen)

Eiszeide

Wie iss das heid so äänfach, Esse unn Dringge fer e paar Daach dehemm se hann.Im Kiehlschrangg halld sisch das Zeisch lang unn noch länger im Gefrierschrangg.Wie had dann mei Mudder das geschaffd, besunnersch an de Feierdaache,Weihnaachde, Oschdre odder Pingschde, wo die Lääde paar Daach hinnernannerzu ware? Se had dann Sache kaaf, wo sisch gudd gehall hann: Grauwurschd, roherSchingge, Laxschingge, alles aam Schdigg.
Im Winder war’s äänfacher. Dò had’s jò im Haus vill kalde Schdelle gebb, fer ebbeskiehl se schdelle. Ohne Heizung ware auser der Kisch unn manschmò der guddSchdubb all annere Reim kald. Uff der Finschderbangg had die Budder ihr Blädzjegefunn. Drebbehaus unn Keller ware besunnersch kald.
Awwer wie war’s im Summer? Nadierlisch hann sisch die Hausfraue dò aa se helfegewussd. Mei Ooba had, wie all Handwerger, e Dimmelkarre gehad. Der war ausHols, had nur vòòre zwei Rääder gehad unn hinne zwei Bään. Mid zwei digge rundeHolsgriffe kunnd ma die Bään aanheewe, de Karre drigge unn lengge. Mid demmFahrzeisch isser in de Schlachdhof gefahr unn had dord ään odder zwei diggeSchdange Eis kaaf. Mier Kinner hann druff gewaard, dass de Ooba solld mim Eishemmkumme. Wammer ne schun vun Weidem kumme gesiehn hann, simmer’mendgeje gelaaf. Das Eis had unnerwääschs schun aangefang se schmelse unn sedribbse. Dò hammer unser Schbass gehad, es Wasser uffsefange, unser Schnissjerdrunner se halle unn mid de Hänn die eisische Schdange se schdreischle.
Dehemm had de Ooba die Schdange glään geglobbd unn in der Wäschkisch in eZinggbidd geschmiss. Uff odder zwische die Eisbräggelscher sinn dann Schisseleunn Dibbe geschdelld worr, fer’s Zeisch, wo drin war, kald se halle. Wann’s Eisverlaaf war, had ma Doose mid Deggele ins eisisch Wasser geschdelld. Irjendwannhad de Ooba widder neies Eis misse kaafe unn hemmschaffe.
Ään gudd Sach war aach, dass de Milschmann, wo graad nääwer uns sei Laade„Budder, Eier Kääs“ gehad had, sunndaas morjens e paar Schdunne uffgehad had,Dò kunnd ma dann frisch kaafe, was ma gebrauchd had.
Unn dann kunnd mei Mudder sisch äänes Daachs gans doll freie: E Eisschrangghammer gridd! Der war aus Hols unn had im Drebbehaus uffem Bodessd gleischnääwe der Korridoordier geschdann, war grien aangeschdrisch unn im owwere Däälmid Blesch ausgeschlaa, dord, wo’s Eis ausem Schlachdhof ninnkumm iss.Unnedrunner kunnd ma dann alles ninnschdelle fer kiehl se halle. UnnermEisschrangg had misse e Schissel schdehn, wo’s Wasser vum Eis, wo mid der Zeidgeschmols iss, dursch e Loch ninngedribbsd iss. Die Schissel had naddierlisch missereschelmäsisch geläärd werre.
Was hann mier Kinner uns gefreid, wann’s nòòm Sunndaachsesse Eis genn had.
Das had mei Vadder selwer gemachd. Das heischd, de’erschd had die Muddermisse e Pudding odder e Krääm koche, wo had misse kald werre. Mier hann eEismaschien gehad. Die had ausgesiehn wie e gläner Äämer aus Hols. In der Middwar e schmaler Zillinder aus Medall, wo de Pudding ninnkumm iss. Zwische deZillinder unnem Hols ware Eisbräggelscher, wo Viehsals druffgeschdreid worr iss;Deggeldruff, unn’s had kinne losgehn. Aan rer Duddel, wo aan der Maschien war,had de Vadder gedräähd. Was dann dò innedrin in Beweschung kumm iss, wäsisch nidd, weil isch noch se glään war, fer die Sach se schdudiere. Misch had jò aanur es Eis indressierd. Isch wääs aa nidd, wie langs gedauerd had, awwer fer mischwar’s e Ewichkääd, bis de Vadder endlisch mid demm Medallzillinder nuff in dieWohnung kumm iss. Die gans Aarwed vòrhäär had sisch nämisch in der Wäschkischabgeschbilld. Es Eis iss in Glasschälscher verdääld worr, unn jeder had’s genosswie’s allerbeschd uff der Weld.
Schbääder had’s dann nidd weid vun uns e Eismännje gebb. Demm Idalliener seiLäädsche war gans glään. Vill Eissorde hadder nidd gehad. Isch glaab nur Vanille-,Schoggolaade-, Zidroone- unn Himbeereis. Der had aa noch kä so e rundes Dinggehad, wo er Eiskuchele ausschdesche kunnd. Mid soome glääne Holsschbachdelhadder die rischdisch Borzjoon vum Eis geholl unn uff runde Eiswäffelscher odderin Waffeltiedscher geschdrisch. Sunndaas in der Zeid nòòm Middaachesse issermid seinem Handkarre mim Eis drin dursch die Schdròòse gang. Wanner sei Bimmelgeleid had, hammer gewussd, dass er ball kummd. Dann had die Ooma uns e groosGlasschissel unn’s passend Geld gebb. Unn dann isser kumm, had freindlisch miduns gelachd unn die Schissel mid Eis gefilld. Owwedruff sinn noch e paarWäffelscher kumm. Uff die ware mer jò aa gans scharf. Schdols simmer ins Hausunn hann uns all, die Junge unn die Alde, iwwer’s Eis häärgemach.
Unn dann war’s äänes Daachs so weid. Mei Eldre kunnde e elegdrischerKiehlschrangg kaafe. Das war e riesisches Ding, heid wird ma saan e gloowischDing mid rer wuchdisch Dier. Gans owwe ar e gläänes Diefkiehlfach. Mei Mudderwar gans gliggisch iwwer die groos Erleischderung. Allerdings had sisch mid derZeid im Kiehlschrangg drin aan de Wänn e diggi Eisschischd feschdgesiddsd.Desweje hadder misse reschelmäsisch abgetaud werre. Das war gans scheen villArwed: De Schdroom abschalle, ausreime, waarde bis es Eis abgetaud war, deSchrangg mid warmer Sääfebrieh unn denòò mid Essischwasser auswäsche,druggereiwe, widder inreime unn inschalde. Heid taue sisch die Kiehlschränggselwer ab, ma brauch se heegschdens mò sauwer se mache.
So ännere sisch die Zeide!

Mundartpost Saar Nr. 80